رواية داليا من 17 للاخير

مجرد مقدمة وتمهيد للي خالد عاوز يقوله.. وأنا هنا علشان أدعمه وأضمنه أمام والدك.
داليا أنا بجد لسه مش عارفة حضرتك بتتكلم على إيه بالضبط.
علاء لخالد تتكلم أنت ولا أتكلم أنا
خالد أخيرا نطق لا طبعا حضرتك تتكلم أنت بمقام أخويا الكبير.
علاء خير إن شاء الله .. ووجه كلامه لوالد داليا وداليا نفسها.. خالد حابب يتقدم ويطلب إيد بنت حضرتك الآنسة داليا .. ونرجو إن طلبه ينال رضاك.
والد داليا والله يا باشمهندس طلبك ده جه فجأه... ومجيتك على عيني.. بس أمور الارتباط دي مش بتيجي بالسرعة دي.. لازم لها شويه اتفاقات وترتبات وسؤال قبل الموافقة .. ولا رأيك أنت إيه.
علاء طبعا عندك حق في كل اللي قلته.. بس أنا سألته نفس الكلام وقال لي إنه مستعد لكل حاجه باقي شويه حاجات قليله محتاجه كم شهر ترتيب.. وحخليه يشرح الوقتي لك كل حاجه وأنت أحكم.
ما تتفضل اشرح يا خالد.
خالد في الأول ياعمي.. اسمح لي أقول لك عمي
والد داليا طبعا اتفضل انت في مقام ابني.
خالد حابب أوضح لك يا عمي إن زيارتي دي مع المهندس علاء زيارة تعارف وإظهار حسن النية وإن المهندس علاء ضامن لي في كل الأمور اللي حنتفق عليها بإذن الله.
والد داليا أهلا وسهلا بكم .. ونعم الرجال.
خالد ثانيا الزيارة الجاية إن شاء الله حيكون معايا أختي الكبيرة وزوجها تنوب عن والدتي ووالدي نظرا لظروف مرضهم .. وإن شاء الله نأكد على الاتفاقات ونقرأ الفاتحه.
والد داليا عين العقل ... ثالثا بقى ايه.
خالد أما ثالثا.. أنا جاي زي لما المهندس علاء وضح لحضرتك طالب إيد بنتك الآنسة داليا.. ومستعد لأي طلبات من شبكة ومهر ومؤخر وقايمه.. كل حاجه.. أنا حاجز شقة بدفع أقساطها في الرحاب وحستلمها بعد 3 شهور إن شاء الله ومحتاج زيهم 3 شهور كمان علشان أقدر أجهز العفش والالتزامات .. الخطوبة زي ما هو متعارف عليها علي العروسة والزفاف علي.. ولو في أي طلبات تانية يا ريت حضرتك تناقشني فيها وأنا مستعد.
والد داليا لا .. أنت كده جبت من الآخر .. كل حاجه تكون زي ما هو متعارف عليه في العرف والتقاليد.. وشبكتك دي هديتك لبنتي.. ومهر والمؤخر زي باقي البنات في العيلة ... كل ده متفقين عليه باقي حاجه واحدة بس مهمة بل أهم حاجه في كل اللي قلناه الوقتي.
خالد أيه هي
الأب رأي داليا نفسها
خالد آه صحيح .. تقدر تسألها أهي أدام حضرتك وأنا منتظر الإجابة.
داليا كانت بجد مش مستوعبة السرعة اللي مشي بيها الموضوع.. لسه كانت بتقول له متلخبطه.. وهو وعدها إن يديها فرصه تفكر ومفيش داعي للاتعجال.. ليه ما نفذ وعده ليها وصبر عليها شويه.
معرفتش وقتها ترد بأيه متنكرش إنها حاسة بمشاعر مختلفة ناحيته .. بس ڠصب عنها .. خاېفة.. خاېفة تتصدم.
الأب ايه يا داليا ممكن أعرف مش بتردي ليه يا ترى سكوتك الوقتي معناه الرضا.... ولا معناه الرفض.
خالد اتخض لما سمع كلمه والدها الرفض.. وقال له رفض إيه يا عمي ... ربنا ما يجيب رفض .. هي تلاقيها حاسه بالمفاجأه.. تسمح لي اتكلم معاها شويه قبل ما تقول رأيها
برق المهندس علاء لخالد وقال له خالد ميصحش اللي أنت بتطلبه ده الوقتي.
والد داليا لا مفيش مشكله .. حقه .. هو بيستأذن مني.. ودي مواضيع زواج مش لعب.. فلازم يكونوا على بينة مع بعض بكل التفاصيل قبل ما يبدأوا الارتباط.. ومن الواضح إنه محصلش أي نوع من التوضيح قبل كده من طرف خالد لداليا بالمواضيع دي.
خالد علشان كده أنا بطلب بس 5 دقايق.. اقعد معاها اتكلم وأحاول أفهمها وجهة نظري.
الأب داليا .. خدي المهندس خالد على غرفة المعيشة اللي جنبنا هنا وخليه يوضح لك هو عاوز يقول لك ايه.. وأطلبي من والدتك تجهز العشا عقبال أما تخلصوا.
علاء عشا ايه ده إحنا يدوب نروح.
الأب عيب ميصحش.. هو حد قال لك إننا مش بنفهم في الأصول ولا إيه
علاء لا أبدا.. بس..احنا جينا فجأه ومن غير موعد فميصحش نقعد على العشا كمان كفاية حسن الاستضافه.
الأب لا بس ولا حاجه ... تشرب قهوة معايا عقبال ما يجهز العشا.
علاء اشرب.. وأنت يا خالد لو سمحت انجز بسرعة علشان منتأخرش أكتر من كده ونأخر الناس.
خالد حاضر يلا يا داليا.. فين غرفة المعيشة دي.
داليا باحراج عمرها ما تعرضت له قبل كده .. اتفضل معايا من هنا.
دخلت داليا خالد الغرفة واستأذنت تروح تبلغ والدتها باللي طلبه والدها.
دخلت لمامتها في المطبخ لقتها فرحانه وبتقول لها مبروك
داليا مبروك ايه يا ماما .. لسه مقلتش رأيي.. ده واحد مچنون
الأم مچنون بحبك يا داليا.. المفروض إن دي حاجه تفرحك مش تترددي خالص.. الراجل مقدرش يصبر لتاني يوم جم بعبلهم من الموقع على هنا.. متستغبيش.. ومتضيعيش فرصة زي دي من أيدك.. الحاجات دي بتيجي مرة واحدة في العمر وبتدق بابك .. مترفضيهاش لأنها ممكن متجيش تاني.. مش بقول لك اختاري بعقلك بس.. دخلي قلبك كمان.
داليا حاضر يا ماما أدعيلي لو سمحت... وبلغتها باللي طالبه منها والدها
دعت الأم لبنتها بالخير .. وقالت لها ثواني والعشا يكون جاهز روحي إنت لخالد اتكلمي معاه .. كفياك تعذيب في الراجل.
ضحكت داليا وراحت لغرفة المعيشة.
أول ما شافها خالد داخله الغرفة وقف يستقبلها.. وسألها اتأخرت ليه كده
داليا لا اتأخرت ولا حاجه.. يا دوب رحت بلغت ماما وجيت.
خالد تحبي تبدائي ولا أبدأ أنا
داليا مندفعه بجد مش عارفه أقول لك إيه
خالد بضحك إيه
داليا إنت بتهرج كمان.. في حد بيعمل عمايلك دي ده أنت حتى مقلتش ليه ولا لأهلي ولا سبت لي الفرصة اللي اتفقنا عليها علشان أفكر... وجبت الراجل معاك على وشه.. ومخلتنيش استعد حتى علشان أقابلك.
خالد كل دي شكليات فارغه يا داليا.. اعذريني في تسرعي أنا حسيت إنه فعلا كان ممكن يجرى لي أي حاجه لو استنيت للصبح علشان آجي ...ده بجد والله ومش بهزر .. كنت بحاول أقول لك بس أنت معرفش جري لك ايه صدتيني من كلمة صباح الخير.. أهلك اتصلت بيهم واخدت منهم قبلها بساعه موعد للزيارة المهندس علاء بيعتبرك بنته وأنا أخوه الصغير ولما صارحته بمشاعري ناحيتك رحب الراجل جدا ووافق ييجي معايا ويضمني لأنه متأكد مني وعارف إن والدك ممكن ېخاف من شخص غريب داخل من غير أهله أول مرة ومن مدينة ثانيه يطلب أيد بنته.. فرصتك أدتها لك خلاص .. كفايه عليك يوم واحد تفكري فيه.. أنت عاوزة تضيعي منا وقت أكتر من 9 شهور اللي عدوا منا وأحنا مع بعض ومش مع بعض في نفس الوقت بجد يبقى حرام عليك.. أما بالنسبة للنقطه الأخيرة واللي هي مستعدتيش.. فأنت مش محتاجه أصلا تستعدي .. أنا عاوزك كده بعبلك.. 
داليا عبلي ايه عبلي دي هو ده رأيك في
خالد أنا كل يوم بشوفك في الموقع بالشكل ده.. ولما لفت نظري كان بالشكل ده.. ولما وقعتيني في حبك كان برده بالشكل ده.... فمش هيفرق معايا خالص جهزتي ولا لبستي ولا لا.. المهم عندي أنت وجواك.. ومشاعرك وكلك على بعضك.. مش لبسك ومكياجك ورطوش في نظري بتغطي على الأصل... فهمتيني ولالا.
داليا بكسوف فهمتك.. بس برده المفروض كنت تقولي الأول.
خالد طيب ممكن أسألك سؤال
داليا اتفضل
خالد لو كنت عرفتك قبلها... كان فرق معاك إيه
داليا اقله الاستعداد النفسي يا خالد.
خالدأولا حلوة خالد كده بس منك.. ثانيا أن بتاع المفاجآت .. مش حابك تكوني مستعده .. عاوز رد فعل طبيعي منك .. مش متحضر.
داليا وأنت ضامن إني أوافق عليك
خالد ده شئ أكييييييييييييييييييييييييييييييد.
داليا وإيه اللي أكده لك كده
خالد لأني متأكد من صدق مشاعري ناحيتك وأحاسيسي.. وإنها خارجه بجد من جوه قلبي.. ومستعد أحلف لك إني بجد معنتش قادر أعيش لحظة من غيرك ولأن مشاعري صادقه عارف إنها تقدر تلاقي طريقها لك وتوصل لقلبك بسهولة.. بل تتربع جواه كمان وتخليكي تمري بنفس الحالة اللي أنا بمر بيها الوقتي.
داليا من جواها اعترفت اد ايه فعلا خالد مأثر فيها من المرة اللي فاتت وشال كتير حواجز وأد أيه كانت مياله بس خاېفة في نفس الوقت بس بحركته اليوم دي متنكرش إنه زاح كتير حواجز كانت باقية من المرة اللي فاتت.. بس خجلها خلاها تسكت متقدرش تعترض.
خالد أفهم من كده انه زي ما بيقولوا السكوت علامه الرضا
ضحكت داليا ومعلقتش
خالد في حاجات كتير حابب أكون صريح معاك فيها .. وأصفي نفسي أدامك باعترافي لك بيها..علشان نبدأ حياتنا مع بعض بصفحه بيضا وعلشان أبرر لك الوقتي طلبي اللي حطلبه منك ومن والدك واللي عاوزك تدعميني فيه وتوافقي عليه أرحوك.
قلقت داليا من مقدمه كلامه.. بس في نفس الوقت كان عندها الفضول إنها تعرف في ايه.
خالد متتصوريش أد إيه احترمت فيك صراحتك.. يوم ما صارحتيني بالتجربتين اللي مريت بيهم في حياتك .. على الرغم إني مش بمثل لك وقتها أي حاجه.. وعجبتني قوي جماتك إن مفيش حاجه تخليك تخجلي من إنك تحكي عن تجاربك..بس للأسف أنا بقى عكسك.. أنا كل حاجه تخليني أخجل من تجاربي وعلشان كده قاعد أدامك أحكي لعل وعسى محسش بالذنب في حياتي بعد كده.. أنا في الجامعه اتعرفت على شله هباب خدوني معاهم على طريق غير طريقي .. ومبرري قصة ارتباط فاشله.. كل يوم كنت بخرج فيه معاهم برجع وأنا محمل بشعور الذنب وقمه القرف من نفسي بتحصل لي وأنا داخل البيت وقت أذان الفجر من سهرة وداخل ألاقي والدي ووالدتي قايمين يصلوا الفجر..أد إيه كنت بكون قرفان من نفسي.. يمكن علشان أنا أصلا بذرتي مش كده .. ويااااااااه يا داليا لما تيجي عيني في عين أمي وترفض تلومني بصوتها بس عينها وبصاتها لي بتدبحني.. وكانت تقول لي ربنا يهديك يا ابني .. ويرزقك بنت الحلال اللي تحبها وتحبك.
أد ايه كلامها ده كان بيقطعني ... بس المشكله إني كنت برده مكمل في طريقي.. زي ما يكون ربنا مش راضي عني.. 
داليا وهي متأثرة وبعدين... كمل... خرج كل اللي جواك
خالد قررت مع نفسي إني مش بتاع جواز خالص.. حقضيها كده وخلاص.. ما أنا بقيت صاحب مزاج.
واشتريت الشقه دي وبدفع اقساطها علشان لما استلمها أكون على... على راحتي يعني فيها.
داليا تنحت في الحته دي وسألته وبعدين
خالد زي ما يكون ربنا رضي عني.. واستجاب لدعوات أمي وأبويا لي.. وحب ينشلني من السكة اللي كنت ماشي فيها .. وأرجع تاني لأصلي وفصلي.. فبعت لي أنت.
داليا عاوز تقولي يا خالد إن