رواية داليا من 5-8

الحلقة الخامسة
مهندس عادل أهلا آنسة داليا .. اتفضلي اقعدي
داليا شكرا يا باشمهندس
عادل أستاذ أسامة اداني السي في بتاعك.. ما شاء الله مؤهلاتك مطلوبة
داليا شكرا حضرتك
عادل ممكن أعرف والدك بيشتغل أيه
داليا والدي ضابط جيش متقاعد
عادل ووالدتك
داليا مدير مالي وإداري بإحدى الوزارات.
عادل جميل ومعاك إيطالي
داليا أنا خريجة قسم إيطالي محتاجة بس شوية تدريب بس الإنجليزي بتاعي الحمد لله ممتاز لأننا درسنا الإيطالي بالإنجليزي.
عادل آهاه
لاحظت داليا إن عادل هو بس اللي بيسأل وإن عبد الله وأسامه مستمعين بس ففهمت إن عادل هنا هو الكل في الكل وهو المسؤول عن التعيينات فقالت لنفسها تيجي زي ما تيجي توكلنا على الله.
عادل قعد يسألها كتير أسئلة عن خبرتها والمهارات اللي تعرفها وهواياتها لغاية أما وصل لنقطة الراتب المتوقع وطبعا داليا عمرها ما اشتغلت قبل كدة ولا تعرف الراتب في الشركات دي كام ولا حتى سألت عن فترة الدوام كل اللي كان هامهها إنها عاوزة تشتغل وتشغل كل وقتها عاوزة تبعد نفسها بأي طريقة عن التفكير في حسام وموضوع حسام طول الشهر ده مش عاوزة أي مؤثرات خارجية تأثر على قرارها بأنها تسيبه.
في اللحظة دي انتبهت داليا لإن المهندس عادل بيكرر السؤال مرة تانية ومستني إجابتها.
اعتذرت داليا وقالت صراحة يا باشمهندس دي أول مرة فعلا أشتغل مسبقش ليا إني اشتغلت ولا عرفت الوظايف دي المرتب كم ولا أعرف حد من صحباتي اشتغل علشان أسأله وعلشان أكون واضحة أكثر أنا اتقدمت للوظيفة دي لأسباب تانية خالص غير المادة أهمها إثبات الذات واكتساب خبرة وإن الشركة بتاعتكم سمعتها سابقاها وأي حد عاقل يحب إن السي في بتاعته يكون مكتوب فيها اسم الشركة دي وأنا موافقة على الرنج المعتاد للراتب اللي أنتم بتحددوه للنوع ده من الوظايف. أنا حتى نسيت اسأل مهندس حسن اللي اتوسط لي هنا في الشركة.
عادل مهندس حسن مين واتوسط لأيه مش فاهم.
داليا والله أنا معرفوش بالضبط هو حد من معارف عمي وعمي اداه السي في بتاعتي يقدمها لمعرفه فهو قدمها في الشركة هنا.
عادل أول مرة اسمع الكلام ده أنا بس شفت السي في بتاعتك أدامي على المكتب معرفش مين قدمها خالص ومين حسن ده.
هنا اتدخل المهندس عبد الله آه افتكرت فاكر مهندس حسن مقاول الباطن اللي بيورد لنا السن لرصف الشوارع هو ده آخر مرة كان هنا اداني فعلا سي في وأنا اخدتها منه وحطيتها في وسط باقي السيفيهات اللي أنت بتختار منها.
عادل أوك فهمت أنا الوقتي أحمدي ربنا إني معرفتش كده قبل اما ادخلك الانترفيو.
داليا ليه.. مش فاهمة
عادل لأن حسن مطلع عيني في التوريدات واقل ما يجب أطلع عينه أنا كمان في أي طلب يطلبه ولو أعرف انك تبعه كنت قطعت السي في بتاعك أول موصلتني.
داليا تنحت واتلبخت وقالت آه أنا عكيت باين كده.
أسامة بضحك ومسك عادل لا خالص يا آنسة داليا إنت ملكيش دخل بالموضوع ده خالص عادل بيهزر ما تخديش في بالك خالص على هزاره.
داليا مفيش مشكلة في أي أسئلة تانية تحبوا إني أجاوب عليها.
عادل لا خلاص كده تقدري تتفضلي حضرتك وإذا في نصيب إن شاء الله حنتصل بيك.
داليا إن شاء الله اشوفكم على خير بإذن الله مع السلامة
ردوا كلهم عليها مع السلامة.
في اللحظة اللي خرجت فيها داليا من المكتب قعد الثلاثة مع بعضهم يتناقشوا في رأيهم في داليا ويسألوا عادل هي في حد تاني عجبه وحيعمل إيه المفروض إن عادل هو المسؤول عن التعاقدات وميزانية المشروع.
عادل والله اتقدم لي ناس كتير وكتير منهم فيهم مميزات بس انتم عارفين إن في كتير حاجات حكماني.
أسامه رتب لنا طيب
عادل زي ما انتم عارفين إن مناقصة المشروع ده لما رست علينا إحنا كنا أقل سعر وبالتالي المكسب بتاعنا مش حيكون اد كده علشان كده لازم نقلل من كل النفقات والبنود علشان نقدر نطلع للشركة ربح.
عبد الله أنا معاك بس ده ډخله ايه في اختيار السكرتارية للشغل
عادل أزاي بقى ډخله أيه مش من ضمن الكوست بتاع المشروع رواتب الموظفين اللي منها السكرتيرة ولو أنا أخترت من اللي اتقدموا لي واحدة عندها خبرة في الشغل ومعاها اللغات اللي أنا عاوزها ومن البلد هنا كل ده حيكلفني كم أما لو أخدت واحدة لسه حديثة التخرج ومعندهاش الخبرة قوي وفيها مبادئ اللي أنا عاوزه كله وأهم حاجه عندها أستعداد للشغل اعتقد إن ده حيوفر لنا النص بالضبط شهريا.
أسامة مفيش فايدة في دماغك آلة حاسبة وأبعادك في الاختيار مختلفة خالص عننا.
أسامة يعني أنا حسيت إن الآنسة داليا الأخيرة مناسبة بنت عيلة مش جاية تلعب وتوقع مهندسين جايين من العاصمة علشان تعلق واحد وتتجوزه وشهادتها مناسبة واللغات والتدريب اللي معاها يناسب احتياجاتنا وفوق ده وده مريحه وشيك وواجهة كويسة للشركة بتاعتنا.
عادل ومين قال لك إني مخترتش نفس البنت كلامي منطبق عليها.
عبد الله بس يا جماعة الخير المشروع كبير وضخم وشغله كتير وأحنا حنستخدم سكرتيرة واحدة بس علشان التكاليف فلازم يكون عندها خبرة علشان تقدر تشيل كم الشغل ده منغير ما تلخبط لنا الدنيا.
عادل ومين قال لك إني مش حستعين بيك تدربها وتساعدها في الحاجات اللي محتاجاها.
عبد الله أنا .. حرام عليك إنت مش شايف حجم الشغل اللي احنا داخلين عليه ومتأخرين اد ايه.
عادل علشان كده عاوز أعين سكرتيرة بسرعة تلحقنا وتلم لينا الدنيا شوية كفاية الحاجات اللي ضاعت ومش عارفين نشيلها صح وبعدين هي باين عليها شاطرة بجد ومش حتغلبك وحتستوعب بسرعة.
عبد الله الله المستعان
أسامة أنا حاسس بجد إنها بإذن الله حتكون صفقة رابحة من كله للجميع بإذن الله.
أول ما نزلت داليا من الفندق وقفت أدام المول الملحق بيه وطلعت التليفون تكلم مامتها وحكت لها على كل اللي حصل.
الأم يعني عينوكي ولا لا.
داليا وأنا أعرف منين يا ماما علمي علمك الراجل قال لي حيكلمني ويبلغني لو اختاروني.
الأم إن شاء الله تكون من نصيبك وربنا يعمل لك الخير أيا كان.
داليا يا رب يا ماما ماما حطلع على أميرة شويه زمانها صحيت من النوم وحرجع كمان ساعتين إن شاء الله.
الأم إن شاء الله متتأخريش وطمنيني لما توصلي عندها.
داليا إن شاء الله
وقفت داليا تاكسي ونزلت عند بيت أميرة أول ما شافتها أميرة قالت لها عارفة لو مكنتيش جيتي من نفسك كنت حزعل منك بجد.
داليا وعلى أيه الزعل أديني جيت أهو.
أميرة حماتك بتحبك عاملين محشي كرنب اللي بتحبيه تعالي نتغدى الأول
داليا حماتي مين مش لما أعرفها خلينا في المحشي الأول.
أميرة يلا بينا على المحشي وأكلوا مع بعض وحكت داليا تفاصيل الانترفيو وطللبت تعليق من أميرة اللي ردت بسزاجه مش عارفه بجد مش عارفة أحدد ده معناه ايه حياخدوك ولا لا كنت بفتكر أسامة ده حيساعدك لغاية أما غلطت وجبت سيرة حسن ده.
داليا وأنا أعرف منين أن الوضع كده كنت فاكرة لما أقول اسمه حيسهل الموضوع مش يعقده أهو اللي حصل بقى.
أميرة خلاص سيبيها على الله ونصيبك حيصيبك بإذن الله.
داليا ونعم بالله
في اللحظة دي رن موبايل داليا بصت فيه لقت رقم غريب ولأول مرة ترد على رقم غريب وقالت آلو
وبعدين اتعدلت فجأه.
أميرة مين في ايه
داليا أيوه يا بشمهندس عادل أنا داليا أزي حضرتك
أميرة هي كمان تنحت
داليا بجد أشكرك يا أستاذ عادل إن شاء الله بكرة حكون فيالميعاد.
أميرة هاه ... خير طمنيني قبلوك
داليا آه يا مرمر وافقوا عليا وعاوزيني تدريب من بكرة إن شاء الله.
أميرة ألف مبروك يا داليا يا حبيبتي عقبال لما أبارك لك على الزواج
داليا لا انسي مش وقته خالص
أميرة كل شئ بميعاد بإذن الله
داليا عندك حق.. كل شئ بميعاد
اسيبك بقى علشان وعدت ماما متأخرش وعلشان أفرحها بقرار التعيين وانام بدري لزوم الشغل بكرة بإذن الله.
أميرة حسيبك براحتك بس ابقي طمنيني عليك مش حكلمك انا ممكن تكوني مشغولة حسيبك أنت تتكلمي.
داليا ماشي يا قمر بإذن الله سلام.
تاني يوم الصبح نزلت داليا الشغل ووصتها مامتها بالوصايا المعهودة لبست بنطلون جينز اسود وعليه تيشيرت واسع رمادي في أسود ولمت شعرها.
ودخلت المكتب استقبلها المهندس عادل ورحب بيها وقال لها في وقتك مضبوط اتفضلي معايا الأول في المكتب قبل ما اسلمك الشغل عاوزة أوضح لك بعض الامور.
داليا مفيش مشكله اتفضل
وفي اللحظة دي دخل استاذ أسامة ورحب بيها برده ودخلوا كلهم مع بعض مكتب عادل اللي بدأ يقول طبعا زي ما وضحت لك إن شاء الله إحنا اخترناك تشتغلي معانا في الشركة هنا وده لعدد من الأسباب أولها وحطي تحتها مئة خط إنك خريجة جامهة القاهرة وشركتنا زي ما أنت عارفة من القاهرة وثاني الأسباب اللغات اللي معاك واللي احنا محتاجينها هنا في المشروع لأن لينا شريك شركة إيطالي لسه بعد تأسيس الشركة هنا حينضموا لينا بإذن الله.
داليا إن شاء الله حكون عند حسن ظنكم
عادل بس لازم حيكون هناك فترة تدريب وهي عبارة عن 3 شهور المفروض في كل الشركات أنا حخفضها لشهر واحد.
داليا مفيش مشكلة.
عادل لا في لأن التدريب بيكون من غير راتب.. موافقة على كده
داليا سكتت شوية وقالت مفيش مشكلة يا بشمهندس
ابتسم عادل وبص لأسامه وقال كده اتفقنا اتفضلي معايا بقى اقول لك أنا محتاج منك أيه.
شايفة المجلد ده.
بصت داليا للمجلد اللي في ايده وقالت أيوه شايفاه ماله
ده المجلد اللي مكتوب فيه دراسة أرض المشروع والتربة واللي لازم ندرسها كويس قبل ما نبدأ شغل في المشروع ده الشركة اللي عملت الدراسة دي شركة أجنبية وللاسف ضاع مني النسخة الألكترونية للمجلد ده معدش موجود من المجلد ده الأ النسخة الورقية دي. حوالي 600 ورقة مطبوعة بالانجليزي طبعا.
أنت قلتي لي فبل كده في الانترفيو انك أخدت كورسات كمبيوتر صح
داليا آه
عادل يعني بتعرفي تنسخي إنجليزي وعربي وتشتغلي ورد وإكسيل.
داليا طبعا
عادل خلاص حلو قوي أول اختبار لك في أول يوم شغل انسخي لي المجلد ده على الكمبوتر في أقصر وقت ممكن واحفظيه على الفلاشة دي واداها الفلاشة.
داليا أخدت منه المجلد والفلاشة وقالت له إن شاء الله وهي عارفة إنه تحدي كبير وصعب بس لازم تكون أده وتنجزه وتعدي من أول امتحان بتوفيق الله.
أسامه بص لعادل وقال له يا شيخ حرام عليك إيه ده كله علشان البنت عبيطة ومعندهاش خبرة تعمل فيها كل ده.
عادل وأنا عملت فيها أيه يعني
أسامة كل ده ومعملتش فيها حاجه الأول الشهر التدريب من غير تعيين وبعدين من غير راتب وبعدين كمان المجلد ده كله تنسخه وتسلمه اليوم..ده ايه الافترى