رواية لماذا من 1-6

قلت لفرح تنزل رفضت.
محمد معقول المهندسة تنزل المحلات اكيد لأ. على الاقل اخوك علي يقوم بالواجب. والله خاېف ابوك يكون لسه مصدق الحرباية فريال ويحرمه من الورث.
سميرة اتخضت وبعدت منه.
سميره معقول
محمد كل شيء جائز وخاصة إنه ماحولش يصالحه ولا يشوفه ومنع إنه يجي البيت.
سميره ربنا يسترحروح اسخن ليك العشاء.
محمد انا اسف حبيبتي لو في يوم ضايقتك بكلامي على ان ابوك مضيع فلوسه عليطى النسوان. اليوم دا كنت متعصب انت عارفه اني كنت مزنوق ورحت استلف منه فلوس وسمعني كلام وحش اني طمعان فيك وانت عارفه اني مش كده وندمت اني رحت عنده.
سميره ليه ماقولتليش
محمد ماكنتش عايزك تاخذي موقف منه وانا كنت بس حاسلتف يومين لحد ما الفلوس تتحول بس هو فهمني غلط.
سميره سكتت وفهمت معاملة ابوها ليها والكلام اللي كان بقوله.
محمد رحت فين يا حبيبتي
سميره بس شويه مصډومة
يتبع
الفصل 5
زهرة اتحسنت بعد مكالمة علي وطول الأسبوع كان بيكلمها لحد ما قررت ترجع الشغل. 
علي طلب منها يقابلها بس مش على الكورنيش. قالها على مكان وهو يجي ياخذها بالعربية. 
لبست فستان طويل أزرق وعليه شال غطت بيه شعرها الي كان مفرود على ظهرها. حاولت تزبط نفسها وحطت البرفان الي جابه ليها علي وكانت مخبياه في الدولاب وسط هدومها وطلعت. 
كانت وداد قاعده تتفرج على مسلسل تركي. 
وداد متشيكة ورائحه فين  
زهره صاحبتي الي شغاله معايا عزمتني نطلع نتمشى شوية على الكورنيش اشم هواء شوية قبل ما بكره ارجع الشغل. 
وداد استني اغير واجي معاك. 
زهره تيجي معايا فين 
واداد الله مش بتقولي طالعه تتفسحي خوذيني معاك انا زهقانه. 
زهره اتصلي بخطيبك قوليله وانا مستنياك. 
زهره قالت جملتها وهي عارفة ان وداد مش حاتقدر تتصل بيه لانه بيتحكم فيها ومش حيخليها تطلع. 
وداد ما انا مش حاقوله انت عارفه إنه منعني اطلع. 
زهره لا يا وداد احنا مش ناقصين قرفه هو وأمه لما يعرفوا انك طلعت من وراه وهو بيتلكك يسيبك. 
وداد خلاص خلاص روحي انت انا مكتوب عليا الهم. 
زهره والله بتصعبي عليا مش عارفة ليه عامله في نفسك كده  
وداد بحبه يا زهره انت ماتعرفيش يعني ايه حب علشان كده مش حاتفهميني. 
زهره اتنهدت. 
زهره بس ماتجيش على كرامتك يا وداد. انت حلوه والف مين يتمناك. 
وداد بعصبيه. 
وداد انت بتضحكي عليا!! حلوه ازاي وانا تخينة و قصيرة و وشي مليان حبوب وكل ما يشوفني يقولي بصي لأختك زي القمر انت طالعه شبه مين وبيقولي لولا الملامة كنت خطبت اختك مش انت. 
زهره دا يومه اسود دا قليل الادب ازاي تسمحيله يتكلم معاك كده وعلي انا كمان . انت حلوه والراجل الي بيحب مابيهموش الشكل وكمان هو مش يعني ملك جمال دا بكرش و سنانه صفرا وما بيعرفش يتكلم ولا يلبس وشايف نفسه عليك علشان عنده شوية فلوس جابهم من شغله في الخليج. اصح يا وداد دا لو اتجوزتيه حايعذبك هو وامه وإخواته. 
وداد روحي انت انا راضيه بنصيبي. 
زهره عن اذنك. 
طلعت زهرة وهي متعصبة من برود أختها. 
اخدت توكتوك وصلت العنوان ونزلت . 
كانت خاېفة الشارع فاضي 
واول مره علي يطلب منها يتقابلوا بره الكورنيش. كانت خاېفه بس في نفس الوقت بتصبر نفسها إن علي متربي وبيخاف ربنا وعمره ماقرب منها. 
وهي واقفة علي ركن عربيته المرسيدس السودا كانت جايباها ليه الحاجة رحمة لما اتخرج. 
اول ما شافها فرح جدا نزل من العربية. 
زهره في نفسها 
زهره يخربيت جمالك حيغمي عليا. 
وصل علي وهو بيضحك من لهفته عليها قرب منها ماحسش بنفسه الا وهو بيحضنها. 
هي شهقت من الصدمة. 
علي اهدي حبيبتي وحشتيني اوي. 
زهره بعدت منه و شها كله أحمر. 
علي اسف اول مره اقرب منك بس كنت بجد محتاج لحضنك بحبك يا زهرة. 
زهرة احنا في الشارع. 
علي دوختيني يا زهرة قلبي مابقتش عارف احنا فين. 
زهرة بتوتر انت جايبني هنا ليه 
علي ايه يا زهرة مش واثقه فيا 
زهرة بارتباك إنت أول مرة تحضني وانا خاېفة وهنا كله عمارات سكنية. 
علي اهدي يا روحي انا آسف خوفتك عايز بس اوريك حاجة حاتعجبك و اوعدك مش حاقرب منك. وحياتك عندي ارجوك مټخافيش وخلي عندك ثقه فيا 
زهرة حاضر . 
علي اتفضلي. 
دخلوا عمارة كبيرة وطلعوا في الاسانسير على الدور الرابع. اتفتح الباب وطلعوا. 
علي طلع مفاتيح الشقة زهره بجد كانت خاېفه ومرتبكة وماكنتش عايزه تخلي علي يحس بيها بس هو كان متابع كل حركتها وعارف إنه اتسرع يحضنها وفضل يلوم نفسه إنه عمل كده. 
فتح الباب 
علي اتفضلي يا زهره مټخافيش حاسيب الباب مفتوح. 
دخلت وهي بتحاول تبعد عنه بخطوات وهو اداها المساحة دي من الحرية. 
زهره مش فاهمه حاجة. 
علي مش انا وعدتك اني لما الاقي مكتب حاجي اخطبك  
زهرة ايوه. 
علي اهو المكتب ايه رأيك انت اول وحده تشوفه لو عجبك بالليل حاروح اتفق مع صاحبه. 
زهره كانت طايرة من الفرح وراحت تشوف الغرف و المكان. 
زهره الف مبروك يا علي. 
علي مبروك علينا. 
راحت هي تشوف البلكونة وهو شايف قد ايه زهره خست و وشها ذبلان. معقول الحب والزعل بيعملوا كده 
زهره مالك يا علي 
علي انا اسف يا زهرة عندي طلب بس ياريتك ما تكسيفيني. 
زهره طلب ايه 
علي في العماره دكتورة عايز اطلع اكشف عليك واطمن. 
زهره فهمت غلط على طول. 
زهره تكشف عليا ليه شايفني ايه قدامك ولا علشان حضنتني وجيت معاك هنا. انا الي غلطانة اوعى من سكتي. 
كانت عايزه تطلع. علي مسكها من ذراعها وقفل الشقة. 
زهره قفلت الباب ليه ابعد يا علي ولا أقسم بالله أصوت ألم عليك الناس. 
علي انت مچنونة ولا دماغك دي فيها ايه 
زهره انت الي دماغك فيها ايه علشان تطلب مني طلب زي دا يعني ايه تكشف عليا الحمدالله انا بنت بنوت ومافيش راجل مرة لمسني. 
علي وانا متاكد من دا كفايه شهقتك وخۏفك لما حضنتك هو دا عيبك يا زهرة متسرعة وعلى طول ظالماني اني بتسلى بيك. ماعندكيش ثقه فيا خالص .قصدي اكشف عليك عند دكتوره طب عام انت مش شايفة شكلك عامل ازاي خسيتي و وشك ذبلان كنت عايز اطمن من الدكتورة على صحتك مش على حاجه ثانية. 
زهره فتحت بؤها من الصدمة ومن غباءها لانها فهمت غلط. 
هو راح البلكونة وفضل واقف متعصب عليه. 
زهرة في نفسها. 
زهره غبيه ازاي انا فهمت كده ماهو من الكلب خطيب وداد ربنا يجحمه في ڼار جهنم. 
عماد خطيب اختها كان شرط عليها تعمل الكشف دا قبل ما تتخطب. وامها اخذتها مع امه عملوه 
ومن يومها زهره متعقده منه وبتكرهه لانه اهان اختها واهلها. 
راحت على البلكونة. 
زهره انا اسفه فهمت غلط بس انت اكيد فاهم ليه فهمت كده كله من خطيب وداد فاكر انا يومها كلمتك وكنت بعيط. 
علي خلاص يا زهرة. 
زهره پخوف خلاص ايه حاتسيبني ثاني 
علي لف عندها. 
علي هو انا كنت سبتك أولاني علشان اسيبك ثاني. انت ليه كده مش حاسه بيا انت عارفه انا فضلت ألف وادور قد ايه علشان اجيب المكتب دا علشان اوفي بوعدي ليك انت عارفه اني كنت حاطط هدف اني اخلص المكتب واشتغل فيه وبعدين نتجوز وقلت معلش استحمل يا علي. 
زهرة انا بصرف على نفسي بنفسي المكتب دا من شقايا