رواية التائهة ج2

قصدي أسأل عن آآ...
رمقتها الفتاة بنظرات شاملة قبل أن تقاطعها متساءلة بصوت واثق 
إنتي عاوزة تعملي حواجبك 
اتسعت مقلتي إيناس في إندهاش قليل وهتفت بصوت متردد 
هاه حواجبي !
أشارت نحوهما الفتاة بإصبعها وهي تجيبها بإيجاز 
ايوه !
حاولت إيناس أن تخفي إرتباكها وعضت على شفتها السفلى قليلا وأجابتها بنبرة مضطربة 
اه .. أيوه أنا .. أنا كنت جاية لكده 
ثم همست لنفسها بحرج 
هما .. هما باين عليهم انهم وحشين 
لم تفهم الفتاة ما قالته إيناس فسألتها 
افندم 
ردت عليها إيناس بإحراج 
لا ولا حاجة أنا بأكلم نفسي بس 
هزت الفتاة رأسها متفهمة ثم لوحت لها بيدها لتتحرك للأمام وهي تقول بجدية 
طب تعالي معايا
جلست إيناس على المقعد الخاص بتجميل السيدات وبدت أكثر توترا وهي تحاول التمدد عليه وبحذر شديد أرجعت رأسها للخلف وبدت غير مسترخية وهي ترمش بعينيها كثيرا أثناء تحديقها في سقفية المكان ..
شعرت بظل ما يقترب منها فوجدت عيني الفتاة محدقة بها ثم أشارت لها برأسها وهي تقول 
اقعدي براحتك متقلقيش 
ثم رسمت ابتسامة مجاملة وهي تسألها بفضول 
دي أول مرة تعمليهم صح 
ابتلعت إيناس ريقها وأجابتها بهمس 
آآ.. اه !
مسحت الفتاة بإصبعها على حاجبي إيناس وتابعت بصوت هاديء 
اوكي أنا مش هاعمل حاجة فيهم هاشيل بس الزوايد ومش هاتحسي بحاجة 
ردت عليها إيناس بتوتر 
اوكي بس ممكن أسأل في حاجة تانية 
أجابتها الفتاة بإيجاز 
اتفضلي 
أخذت إيناس نفسا عميقا وحبسته للحظة في صدرها فقد أربكها اقتراب الفتاة منها وتحديقها بها كأنها فأر تجارب ثم زفرته على مهل وسألتها بحرج 
هو .. هو أنا لو حبيت أعمل شعري يتكلف كام 
ردت عليها الفتاة بإسهاب 
تقصدي استشوار ومكواة ولا فرد الشعر بالبروتين ولا انتي عاوزاه كيرياتين في
حنة سودة كمان !
بدت إيناس تائهة بعد ما سمعته وزادت علامات الحيرة على تصرفاتها ورددت بعدم فهم 
هاه .. ده ايه ده كله 
أكملت الفتاة بصوتها الجاد 
في أوبشنز كتير هنا على حسب اللي يناسبك شوفي انتي حابة ايه أكتر !
اعتدلت إيناس في جلستها وفركت عنقها و الذي تألم بسبب إرجاعه لوقت ليس بالقليل للخلف بيدها ثم 
سألتها بإهتمام 
وتكلفة كل حاجة منهم ايه 
تنهدت الفتاة وهي تجيبها 
بصي على حسب .. الأرخص هو الفرد بالاستشوار و بالمكواة السراميك بيفضل شعرك كام يوم حلو وبعد كده بتغسليه فبيرجع زي ما كان !
حكت إيناس طرف ذقنها وهي تسألها بجدية 
أها طب والبروتين ده 
ردت عليها الفتاة بهدوء 
ده بيفرد الشعر لفترة طويلة وبيبقى زي الحرير بالظبط 
مطت إيناس شفتيها في إعجاب .. فربما يكون هذا هو الحل الأمثل لشعرها المجعد .. ثم تساءلت بإهتمام أكبر 
والله والكيرياتين زيه 
أجابتها الفتاة وهي تشير بيدها 
ده قريب من البروتين بس نسبة الفورمالين أعلى شوية وسعره أرخص !
صمتت إيناس للحظة لتفكر فيما قالته فقد أعجبت بتلك الحلول السحرية لعلاج مشاكل الشعر وبالتالي ستتغلب على سخرية الأخريات منها ولاح في خيالها صورة لها وهي في هيئتها الجديدة ..